10. august 2000

UKA 2000 / 23

 

Takornariartitsinermik inuussutissarsiuteqarnermut aningaasalersuinikkut tapiisarneq pillugu Inatsisartut inatsisaata allanngortinneqarneranik Inatsisartut inatsisaannut nassuiaatit.

 

Nassuiaatit nalinginnaasut

Aningaasaateqarfik Unnuisa (Unnuisarfinnut aningaasalersuinikkut tapersiisarfik) 1. januar 1997-imi pilersinneqaramili takornariartitsisartut unnuisarfeqartitsinermikkut atugaannik ilisimasaqalerlunilu paasisimasaqarlualersimavoq, aamma ilusilersugaannikkut aningaasalersuinikkullu ajornartorsiutaannik. Pissutit tamakku, kiisalu aningaasaateqarfiup aningaasanik agguaassassaarunnera, pissutigalugit inatsit allanngortittariaqalerpoq aningaasaateqarfik sulinerminik nangitsisinnaassappat. Allanngortitsisoqarneratigut aningaasaateqarfik taarsigassarsianit ernialinnit aningaasalersorneqalissaaq, tassa aningaasanut inatsisikkuinnaanngitsoq aammalu taarsigassarsiarititaarersut taarserneqartarnerisiguinnaanngitsoq (tak. § 8). Aammalu misissueqqissaartarnertigut misilittakkatigullu paasinarsivoq aningaasaateqarfiup sulinera allanngortinneqartariaqalersoq aammattaaq tamakkuninnga sulialinnut nammineerluni orniguttalertussanngorlugu.

TAT (Takornariartitsinikkut Aallarnisaasunut Tapersiisarfik) taarsigassarsisitsinermigut tapersersuisinnaajunnaartitaassaaq. Isumaqartoqarpoq aningaasalersueriaaseq pissarsiaasartunut sanilliullugu allaffissornikkut piffissartornarpallaartoq, kiisalu taanna taarsigassarsisitsisarunnaarpat Namminersornerullutik Oqartussat aningaaserivinnut nalinginnaasunut unammillertariaarutissapput. Aammattaaq aaqqissuussinerup allaffissornikkut aqunneqarnerata siunissami allanut suliassiissutigineqarnissaa eqqarsaatigalugu allanngortitsineq naleqquttutut isigineqarpoq.

Aningaasatigut allaffissornikkullu kingunissai

Aningasaateqarfiup Unnuisap allanngortinneqarnera aningaasatigut kinguneqartussaavoq, tassami aningaasanut inatsisikkut aningaasaliisoqaqqittalertussaammat. Ukiumi aningasaasanut inatsiseqarfiusumi aningaasaateqarfiup 500.000 kr.-inik aningaasaliiffigineqarnissaa kiisalu ukiuni missingersuusiorfiusuni 2002, 2003 aamma 2004-mi tamani 500.000 kr.-inik aningaasaliiffigineqarnissaa siunnersuutigineqarpoq. Tamatuma saniatigut ilimagineqarpoq allaffissornermut piffissartornerunermut pissuteqartumik kiisalu orniguttarluni sulinermut aningaasaateqarfiup allattoqarfiata aningaasartuuteqarnerulernissaa. Aamma suliniutit ataasiakkaat naliliiffigineqarneranni akilersinnaasusii kisimik misissorneqartarunnaassapput, aammali suliniutit allanit aningaasalersorneqarsinnaanersut misissorneqartalissaaq, tamannalu allaffissornerup annertunerulissutigissavaa. Siusinnerusukkut aningaasaliissutigineqartartunut naleqqiullugu aningaasanik killeqartumik amerlassuseqartunik aningaasanut inatsimmut aamma ukiunut missingersuussiorfiusunut siunnersuuteqarnermut pissutaavoq, massakkut nalilerneqarmat takornariatitsinermik inuussutissarsiuteqarnermi unnuisarffissanik toqqaannartumik amigaateqartoqanngitsoq.

TAT-imik aaqqissuussinerup allanngortinneqarnera toqqaanartumik aningaasatigut kinguneqassasoq ilimagineqanngilaq. Taarsigassarsianik allatut aaqqissuunneqartarneri aningaasartuuteqarnerulernermik kinguneqannginnissaat anguniarneqarpoq. Taarsigassarsiat pioreersut allatut aaqqissuunneqarnissaannik siunnersuut pillugu taarsigassarsisitsisup tapersiiffigineqarsimasullu isumaqatigiissutissaata suliarineqarnera siunissaq qanittoq isigalugu taperseeriaatsit atuuttut allaffissornikkut suliassartaannit suliassaqartarnerunissaanik kinguneqassasoq naatsorsuutigineqarpoq. Naatsorsuutigineqarpoq siunissami allaffissorneq annikilliartortinneqassasoq, tamannalumi allanngortitsinermi tunngavigineqartut pingaarnerit ilagaat.

 

Allannguutissatut siunnersuummi aalajangersakkanut ataasiakkaanut nassuiaat

§ 1-imut

Nr. 1-imut

Aningaasaateqarfiup Unnuisap siunertaa tassaavoq takornarianut unnuisarfiliortiternermut aningaasalersuinikkut tapersiisarnissaq. Siunertat ilaneqarput aningaasaateqarfik alliliinernut nutarterinernullu aningaasalersuinikkut tapersiisinnaanngorlugu, aammalu aningaasaateqarfik tamatumani periarfissanik nutaanik misissuisinnaanngorlugu suliniuteqarsinnaanngorlugulu. Taamalu takornariartitsinermik inuussutissarsiuteqartut unnuisarfiutaasa pisariaqartitsinivimmut siunissamilu pisariartitsinermut naatsorsuutigisamut naammattumik amerlassuseqalernissaat kiisalu pitsaasuseqalernissaat siunertaralugu aningaasaateqarfik misissueqqissaarsinnaalissaaq, akilersinnaassutsinik misissuisinnaanngussalluni, allatullu aleqqussaanernik iliuuseqarsinnaanngorluni.

Allanngortitsinikkut naatsorsuutigineqarpoq aningaasaateqarfik ullormut mannamut sulinermini misilittakkaminik atorluaanerulersinnaassasoq, tamatumuunakkullu suliniarnermini siunertaqarluarnerulissasoq pitsaanerusumillu sulilissasoq. Siunertarisap allanngortinneqarnerata naasataanissaaq aningaasaateqarfiup malittarisassai allanngortinneqarput. Malittarisassat allannguutaat aningaasaateqarfiup siulersuisuinit akuersissutigineqassapput, tamatumalu kingorna Aningaasaateqarfiit pillugit pisortatut oqartussanit akuersissutigineqarlutik.

Nr. 2-mut

Inatsimmi maannamut atuuttumi takuneqarsinnaavoq aningaasaateqarfik Unnuisa ukiumoortumik Aningaasanut Inatsisikkut tapiiffigineqartartoq. Siullertut tamanna maanna allanngortinneqarpoq, aningaasaateqarfik suli amerlanerusunik aningaasaliiffigineqarsinnaanngorlugu. Aappaatut soqutiginnittut allat aamma aningaasaateqarfimmut aningaasaliisinnaanngorput. Siullermut tunngatillugu tunngavilersuut tassaasoq, ukiumoortumik inatsisinik tunngaveqarluni aningaasalersuineq naleqquttutut isigineqanngimmat, tassami tamatumani ukiumoortumik aningaasanut inatsisip isumaqatigiinniutigineqartarnerini tulleriiaarinerit apeqqutaalersussaammata. Ulloq mannamut aningaasaateqarfik katillugit 27 mio. kr.-inik (1997-mi 15 mio. kr.-inik aamma 1998-imi 12 mio. kr.-inik, kisianni 1999-imi aamma 2000-imi aningaasaliiffigineqarani) Namminersornerullutik Oqartussanit aningaasaliiffigineqarnikuuvoq. Aningaasaateqarfik aningaasanik pilersorneqanngippat aningaasaateqarfiup siunertani naammattumik naammassinngitsooratarsinnaavaa. Tamatumunnga atatillugu Naalakkersuisut aningaasalersuisinnaasutut ilaatigut Nunat Avannarliit Killiit Aningaasaateqarfiat allallu taasinnaavaat. Naalakkersuisut suliniutiginiarpaat tamatuma misissorneqarneranut Namminersornerullutik Oqartussat peqataassasut.

Nr. 3-imut.

Allanngortitsinerup nassataraa aningaasaateqarfiup siunertaata allanngortinneqarneranut naapertuuttumik aningaasalersuinikkut tapersiisarnerup saniatigut, aningaasaatit § 2, imm. 1-imi sulianut taaneqartunut atorneqarsinnaasut, allaffissornikkut aqutsinermut ilaasa annikitsuinnarmik atorneqarnissaat, aamma aningaasaatit erniortinneqarnissaanik piumasaqaatip peerneqarnera eqqaasanngikkaanni.

Nr. 4-mut

Imm. 8-ikkut nutaakkut qularnaveeqqusiivigineqarnissamik qinnuteqaatit arlaannaannulluunniit attuumassuteqanngitsumit nalilersorneqartarnissaat qularnaarneqassaaq.

Imm. 9 iluarsiissutit kingunerisaanik aaqqiissutaavoq, inatsimmi aalajangersakkamik nutaamik ikkussisoqarnerata nassataa.

Nr. 5-imut

Imm. 2-ikkut aningaasalersuinikkut tapersiissutit atorneqarfissaat erseqqissarneqarput, tassa unnuisarfiliortiternernut aamma unnuissarfiit allilernerinut. Tassunga ikkunneqarpoq unnuisarfiit pioreersut nutarterneqarnerinut aningaasalersuisoqarsinnaaneranut periarfissat. Nutarterinermut ilaatinneqanngillat iluarsartuussinerit, tassa pisariartinneqartumik qaqortumik qalipaanerit, qalipaanerit aamma iikkanik qilaanillu ungalitsersuinerit aamma naternik iluarsaassinerit.

Nr. 6-imut

Aningaasalersueriaaseq ernialersorneqanngitsunik taarsersugassaanngitsunillu taarsigassarsititsisarneq allanngortinneqarpoq imaalersillugu taarsigassarsiat erniaqanngitsut taarsersugassaan-ngitsullu kiisalu taarsersugassat imaluunniit taarsigassarsianut qularnaveeqqusiinerit akuleriisillugit, inatsisip siunertaanik naammassinnittut. Tamatuma kingunerisaanik taarsigassarsisoq pisussaaffeqalissaaq akilersuutinik ernianillu nammataqarnissaaminut. Taarsigassarsiat ernialittaat, qularnaveeqquserneqarsimasugunik qularnaveeqquserneqanngikkunilluunniit, aningaaserivimmi imaluunniit aningaasalersuisarfimmut akuerisaasumit atugassarsiarineqarsinnaapput, sivisunerpaamik ukiuni qulini ingerlasumik ukiut tamaasa nalikillilerneqartartunngorlugit.

Nr. 7-mut

Taarsigassarsiarititat amerlanerpaamik unnuisarfiup pilersinneqarneranut allilerneqarneranulluunniit aningaasartuutit 40%-iinik annertussuseqarsinnaapput. Taarsigassarsiarititat procentiisa angissusaannut suliniutit ataasiakkaat akilersinnaassusiat kiisalu allanit aningaasalersorneqarsinnaassusiat apeqqutaassaaq. Naatsorsuutigineqarpoq suliniutit allanit tamakkiisumik aningaasalersorneqarsinnaanngitsut, siunissarli isigalugu akilersinnaasutut nalilerneqartut, aningaasaateqarfimmit aningaasaliiffigineqarsinnaasasut. Aamma piumasaqaatigineqarpoq taarsigassarsinikkut aningaasaliissutit ikinnerpaamik 50%-ii taarsigassarsiaassasut ernialersukkat.

Imm. 2-mi taaneqarpoq taarsigassarsiat qanoq sivisutigisumik taarsersorneqarnissaat, erseqqissarneqarporlu erniaqaratik taarsersuutitaratillu taarsigassarsianut piumasaqaatit suuneri.

Imm. 3-mi erseqqissarneqarput taarsigassarsianut ernialersukkanut piumasaqaatit suuneri.

Imm. 4 iluarsiissutit kingunerisaanik aaqqiissutaavoq, inatsimmi aalajangersakkamik nutaamik ikkussisoqarnerata nassataa.

Imm. 5 ikkunneqarpoq qularnaveeqqusiilluni taperseeriaatsimut piumasaqaatinut erseqqissaassutitut.

Imm. 6 ikkunneqarpoq qularnaveeqqusiinermi piumasaqaatinut sukumiinerusumik erseqqissaanertut.

Nr. 8-mut

Aalajangersagaq ilanngunneqarpoq, tapersiissutit tunniunneqartut unnuisarfinnik pilersitsinermut aamma nutarterinissamut atugassat, siunertanut allanut, inatsisip matuma killigititaasa avataniittunut, atorneqarnissaat pinngitsoorniarlugu. Qularnaveeqqusiineq ilanngunneqarpoq, aalajangersagaq aamma aningaasaleeriaatsimut tassunga atuummat.

Nr. 9-mut

Aalajangersakkakkut TAT-p allaffeqarfiata suliassai annertusineqarput, taamaaliornikkut taarsigassarsititsisup aamma tapersiissummik pissarsisup akornanni taarsigassarsiat atuuttut allan-ngortitserneqarnissaat pillugit isumaqatigiissusiornissap piareersarneqarnerani peqataasinnaan-ngortillugu. Matumani taamaallaat pineqarput, takornariartitsinermik inuussutissarsiuteqarnermut aningaasalersuinikkut tapiisarneq pillugu inatsit naapertorlugu taarsigassarsiaritinneqartut. Taamaalillu taarsigassarsiaritinneqareersut tapiissutinngortillugit allanngortinneqarsinnaapput imaluunniit qularnaveeqqutinngortillugit (tak. § 14) aamma allangortiterneqarnissaat qinnutigineqassapput, illuatungeriinnut marlunnut pilerinartunngortikkumallugit.

Nr. 10-mut

TAT-mik aaqqissuussineq aqqutigalugu aningaasalersuinikkut tapersiissutinik pissarsinissamut periarfissaq allanngortinneqarpoq, taarsigassarsititsisoqarnissaanik periarfissaq atorneqarsinnaajunnaarsillugu, taamaallaalli tapiissuteqartoqarsinnaalluni aamma qularnaveeqqusiissoqarsinnaalluni. Aalajangersagaq ilanngunneqarpoq, Namminersornerullutik Oqartussat aningaasalersuisartunut qangali ingerlatsisunut allanut takornariartitsinermut tunngasuni taarsigassarsianik annikitsukkuutaaniit taarsigassarsititsisarnermi unammillernissaat pinngitsortinniarlugu.

Taamaalilluni Namminersornerullutik Oqartussat nunami inuussutissarsiutinut aningaasalersuinikkut tapersiisarnerata assinga periuseq pineqarpoq, tak. Nunami inuussutissarsiutinut aningaasalersuinikkut tapersiisarneq pillugu Inatsisartut inatsisaat. Tassani aamma pineqarput qularnaveeqqutit aamma tunisassianik ineriartortitsinermut tapersiissuutit assingusut.

Imm. 2 allannguuteqanngilaq.

Imm. 3-mi pineqarput, taarsigassarsiat isumaqatigiissutaareersut qularnaveeqqutinut imaluunniit tapiissutinut allanngortiterneqarsinnaasasut, imaluunniit taakku kattunneqarsinnaasasut. Siunissaq isigalugu allanngortiterinerup nassatarissaavaa, inatsisip allaffissornikkut atortinneqarnerata isumalluutinik annikinnerusunik atuiffiuneruneq.

Imm. 4-mi pineqarput, periuseq aamma aningaasalersuinikkut tapersiissarnermi piumasaqaatinut tunngasut Naalakkersuisut maleruagassiorsinnaanerisa saniatigut, aamma taarsigassarsiat, inatsimmi matumani kapitali 3 naapertorlugu tunniunneqartut, pioreersut allanngortiterneqarsinnaanernut tunngasut Naalakkersuisut maleruagassiorsinnaagaat.

§ 2-mut

Inatsit atuutilerpoq ulloq 1. januar 2001.